CEBU, Philippines - Maayong pagkatagak ug pagkabuslot sa ulo sa usa ka lalaki human kini pusila sa usa ka estambay pasado alas-10 kagahapon sa buntag sa sitio Gun Club Banawa, barangay Guadalupe.
Ang biktima gihulagway nga nagpangidaron og 30-anyos, medium build, nag-itom og bonnet, nag-helmet, nagsuot og Ray Ban, itom nga t-shirt ug blue nga maong nga shorts.
Sa pakighinabi sa Banat News ni SPO4 Alex Dacua, team leader, sa Cebu City Police Office Homicide Section, misaysay kini nga ang biktima sakay sa usa ka motorsiklo uban sa laing duha ka lalaki nga nagsakay usab og laing motorsiklo nga itom.
Matud pa ni Dacua nga base sa ilang nakuha nga impormasyon nga ang biktima backrider sa motorsiklong itom nga kalit lang mipatim-aw sa maong lugar ug sa walay igong hinungdan namusil sa mga estambay nga nagtapok.
Nakadagan ang mga estambay apan ang usa niini nga wala pa mailhi nga aduna usab armas mibalos og pusil ngadto sa biktima nga naigo sa luyong bahin sa ulo ug natagak ug namatay. Ang kapolisan mihimo na og hot pursuit operation sa nahitabo ug nakuha diha sa crime scene ang tulo ka kabhang sa kalibre .357 ug tulo usab ka buhing bala, laing nakuha mao ang upat ka kabhang sa kalibre .9mm, usa ka metal fragment, usa ka undetermined slug, duha ka silver nga ariyos ug usa ka cellphone.
Butyag pa ni Dacua nga ilang gisubay nga posibling personal nga panagbangi ang motibo sa pinusilay lakip na ang panagribal sa fraterniy ug ilegal nga drugas.
Samtang nakuha sa kapolisan ang plaka sa motor nga gisakyan sa biktima diin aduna kini numerong 4140-YB nga ilaha nang gisubay sa Land Transportation Office-7. (EIM)(BANAT NEWS)