Mitulis sa bayot natiklo

CEBU, Philippines - Nadakpan sa kapolisan ang usa ka tawo nga suspetsado sa pagtulis sa bayot nga gikadug niini sa sulod sa Hidden Lodge sa barangay Guizo, dakbayan sa Mandaue sa miaging kaadlawon.

Ang nadakpan mao si Geronimo Vallejo, 31, minyo nga taga dakbayan sa Danao, samtang ang bayot nga biktima giila lang sa ngalang Julius, 37, nga taga barangay Alang-Alang sa maong dakbayan.

Si PO1 Earl Famador sa kapolisan sa Presinto 1 sa Mandaue City Police Office (MCPO) sa barangay Centro mibutyag nga gikahibalag sa biktima ang suspetsado sa usa ka KTV bar sa maong dakbayan.

Unya matud pa ni PO1 Famador nga nakig-inom pa kini kuyog sa iyang mga barkada ug nianang pagka-kaadlawon na giagni ang biktima nga mo-check -in sila sa Hidden Lodge.

Matud pa ni PO1 Famador nga didto sa sulod sa motel nagtagbaw sa lawasnong kalipay ang suspek ug ang biktima hangtud nga gimandoan sa bayot ang suspetsado nga mo-blue job niini o modugang pa og laing hugna sa kombati sa kama   kay giganahan ang biktima.

Apan ang maong mando giingong nakapasuko sa suspek ug mideretso og tukmod sa biktima dayong hakop sa kuwarta sa biktima nga P1,400 ug cellphone niini dayong gawas sa motel.

Gigukod sa bayot ang suspetsado kinsa nakasakay dayon og taxi niatong              tungora.

Matud pa ni PO1 Famador nga dihang nadawat nila ang maong alarma gigukod   dayon nila ang suspetsado ug ila kining naapsan   didto sa barangay Cambaro ug diha-diha ila dayon kining gisikop ug gibalhog sa detention cell.

Kasong pagpanulis ang gisang-at sa kapolisan batok sa suspek. (BANATNEWS)