CEBU, Philippines - Usa ka lalaki ang gidunggab ug gipusil patay sa usa ka bakol atubangan sa iyang kapuyo pasado alas-10 sa buntag kagahapon sa Quijano Compound barangay Calamba ning dakbayan.
Ang biktima nailhan nga si Andres Carpila, 30, taga sitio Pailob barangay Sambag 2 samtang ang suspetsado giila sa pangalan nga Marlon Kimpang kinsa giingong nakauban sa biktima sulod sa karsel dihang ang biktima nabilanggo tungod sa kasong anti-dispatching.
Sa pasiunang imbestigasyon sa kapolisan nasayran nga ang biktima nagbaklay uban sa iyang kapuyo nga si Merlyn Dionson aron unta mamalit og pagkaon.
Apan kalit lang nga mibutho ang suspetsado ug gikomprontase ang biktima kabahin sa karaan nilang panagsungi samtang diha pa sila sa prisuhan hinungdan sa ilang tinubagay.
Tunga-tunga niini kalit nga mibunot ang suspetsado og kutsilyo dayong dunggab sa biktima human maigo ang biktima sa tiyan gitiwasan kini og pusil sa suspek diha sa bukton ug sa dughan.
Ang biktima gisuwayan unta pagtabang sa Emergency Responding Unit Foundation (ERUF) apan nakabsan na gyud kini sa kinabuhi samtang ang suspek daling naka-eskapo.
Ang kapolisan mipahigayon og hot pursuit operation sa barangay Guadalupe diin midagan ang suspetsado apan wala na kini igkita. Nakuha diha sa crime scene ang usa ka “batangas” nga posibleng gigamit sa pagpanunggab.
Matud pa sa kapuyo nga si Dionson, ang biktima ug ang suspetsado dugay nang adunay panagbangi kaniadto pa sa diha nga diha pa sila sa Cebu city Jail. (BANAT NEWS)