CEBU, Philippines - Giklaro ni Erik Monsanto, ang marketing associate sa Blue Water Resort nga dili ilang empleyado ang nagdala sa jet ski nga nagguyod sa banana boat nga giluwanan sa tulo ka mga Koreana diin usa kanila ang namatay samtang naangol usab ang duha dihang nadasmagan kini sa usa ka pump boat sa kadagatan sa barangay Maribago sa dakbayan sa Lapulapu sa miaging Domingo.
Ang namatay mao si Ji Sung Sook, 50, samtang ang naangol mao sila si Park Mi Su, 51, ug Li Ug Kuyinfg, 56, pulos taga South Korea.
Hinuon giangkon mi Monsanto nga nag-check -in sa ilang resort ang maong mga langyaw apan nanggawas kini ug nangontrata og laing jet ski nga gimaneho ni Jovanni Paquibot sa pagguyod sa banana boat nga giluwanan sa mga biktima.
Apan pag-abot nila sa duol sa Sea Adventure Aqua Sports Resort sa sitio Looc sa barangay Maribago sa maong dakbayan nakasugat sila og usa ka pump boat nga gimaneho ni Alisen Tongco Jr, ug dihang nadasmagan ang banana boat, nangalagpot sa dagat ang mga Koreana nga sakay niini ug gumikan sa kabun-og sa lawas nga nahiagoman namatay si Ji Sung Sook.
Gitataw ni Monsanto nga ang ilang mga tawo sa Blue Water Resort adunay tukmang pagbansaybansay ug iyang gipaniguro nga luwas ang ilang mga guest nga mo-check in sa ilang resort.
Dugang pa niya nga tungod kay ila mang mga guest ang mga biktima ilang gihimo ang tanang tabang niini ngadto sa patay’ng lawas sa biktima ug sa lain pang duha nga naangol kinsa anaa karon sa Mactan Doctor’s Hospital sa maong dakbayan.
Samtang si PO2 John Carlo Jocotan sa homicide section sa kapolisan sa maong dakbayan nga nahinabi sa Banat News miingon nga magpadayon pa ang ilang himoong imbestigasyon kalabot sa maong aksidente sa kadagatan.
Hinuon iyang giklaro nga ang nagdala sa jet ski nga si Paquibot ug si Tongco nga nagdala sa pump boat nga nakaingon sa maong hitabo kasamtangan nilang gitanggong sa ilang detention cell. - (BANAT NEWS)