CEBU, Philippines - Nabun-og ang usa ka batan-ong lalaki human kini tabangi og kulata sa mga standby dihang nadakpan kini sa akto nga nangawat og mga metro sa tubig ug mga wire gikan sa nasunog nga mga balay sa sitio Pulang Bukid sa barangay Alang-Alang, dakbayan sa Mandaue niadtong miaging adlaw.
Ang gitabangan og kulata mao si Jesson Mahusay, 23 , taga purok Limonsito sa barangay Umapad sa maong dakbayan. Gitapuk-an kini sa mga standby ug maayo nalang kay nasalbar kini suwerte sa mga barangay tanod sa maong dapit.
Ang mga barangay tanod sa Alang-Alang nga sila si Ronie Galleon ug Ramenaldo Pacaldo maoy misanta sa mga tawong mikulata sa biktima ug ila kining gihatod ngadto sa buhatan sa kapolisan sa Presinto 1 sa Centro Police Station sa maong dakbayan.
Si PO1 David Omambac sa kapolisan sa Presinto 1 nga nahinabi sa Banat News miingon nga tungod sa mga bun-og sa lawas sa biktima ila kining gihatod ngadto sa tambalanan.
Human matambali sa Mandaue City Hospital ila dayon kining gibalhog sa detention cell ug gipaabot nga motunga ang mga biktima nga gikawatan og metrohan ug mga wire sa maong dinakpan nga mopasaka og kaso batok niini.
Si PO1 Omambac miingon nga samtang nagkaguliyang ang mga molupyo sa maong dapit gumikan sa sunog nga nahitabo niadtong Biyernes sa hapon, ang suspetsado mimaneho usab sa pagpanangtang sa mga metro sa tubig. (BANATNEWS)