CEBU, Philippines - Dili lisensyadong gwardya ang amahan nga miunay og ‘hostage’ sa iyang 15-anyos nga anak babaye niadtong miaging semana sa sitio Kinamagan sa barangay Poblacion lungsod sa Borbon.
Kini ang gipadayag ni Supt. Rex Derilo, hepe sa Firearms Explosives Security Agency Guards and Supervision Section (FESAGSS)-7 subay sa resulta sa ilang imbestigasyon batok sa suspek nga giingong sakop sa GDS Security and Detective Agency.
Ang suspek giingong maoy nagbantay sa usa ka dakong tindahan sa dakbayan sa Mandaue dihang iyaha kining gibiyaan niadtong Oktubre 31 aron apason ang iyang pamilya sa Borbon nga mibuwag na kaniya.
Pagka-petsa uno sa Nobiyembre iyang giunay og ‘hostage’ ang iyang 15-anyos anak babaye ug milungtad og 16 ka oras una pa niya kini gibuhian pagkasunod adlaw na.
Si Derilo miingon nga ang armas nga gigamit niini pagpabuto atol sa hitabo dili kadto isyu sa GDS Security and Detective Agency.
Nakompirmar nga sakop sa GDS ang maong suspek apan dili lisensyadong gwardya.Matud pa ni Derilo miangkon ang maong security agency nga naka-training ang suspek apan walay lisensya.
“The good thing kay ang armas gigamit sa gwadya dili service sa GDS, kato personal offense to niya (gwardya) gi-file-an naman siya og illegal possession of firearms sa kapulisan sa Borbon,” dugang pang Derilo.
Si Derilo mitataw nga ilaha karung susihon kung unsay posibling kalapasang administratiba sa agency sa suspek.
Matud ni Derilo kun makompleto ug mahuman na gyud niya ang imbestigasyon iyaha kining iduso ngadto sa buhatan ni PRO-7 Chief Supt. Marcelo Garbo Jr. (BANAT NEWS)