Gipusil patay dayon giiloga'g motor

CEBU, Philippines -  Gipusil patay ang usa ka drayber sa habal-habal ug pagkahuman gikarnap pa ang iyang motorsiklo sa duha ka mga lalaki niyang pasahero diha sa sitio Gila-gila sa barangay Bagalnga lungsod sa Compostela niadtong Lunes sa alas 10:00 sa gabii.

Ang biktima nga patay nang nadangat sa tambalanan mao si Jason Gahi Noya, 28, taga sitio Bali barangay Cogon, Compostela ug habal habal drayber apan way swerte ang usa sa mga gipasanginlang suspek kinsa nadakpan dayon.

Ang usa sa gipasanginlan ug nadakpan mao si Joel Hermoso Batoon, 26, taga barangay Looc siyudad sa Danao.

Matud ni PO2 Arni Goc-ong sa Compostela Police Station dihang nahinabi sa Banat News misakay ang mga suspek ug nagpahatud sa barangay Bagalnga apan pag-abot sa nahitaboan gipahunong kini sa mga suspek ug walay daghang pasumangil gipusil ang biktima makadaghang higayun.

Ang biktima nga naigo sa dughan ug tuong abaga natagak gikan sa iyang motor ug diha-diha gisakyan sa mga suspek ang motorsiklo ug misibat pahilayo.

Ang biktima daling gihatud sa Danao City District Hospital sa nakabangal kaniya apan gideklarar kini sa mga doktor nga dead on arrival (DOA).

Atol sa follow-up operation nakit-an sa kapulisan ang motorsiklo sa biktima nga Honda Wave kolor itom ug nadakpan ang suspek nga si Batoon alas 2:30 kagahapon sa kaadlawon diha sa sitio Egis sa Poblacion, Compostela apan wala madakpi ang kauban niini. (EIM)(BANAT NEWS)