CEBU, Philippines - Gidakop ug gipaslak sa karsel ang usa ka 51-anyos nga backhoe operator human kini masakping nanghinol sa pribadong lawas sa usa ka 11-anyos nga iyang silingan diha sa sitio Curva, barangay San Vicente sa lungsod sa Liloan niadtong Domingo sa alas 7:00 sa gabii.
Ang biktima nagtungha sa elementarya apan wala matino kun unsang graduha ug nagpuyo sa maong lugar ug gitago lang una ang pangan.
Samtang ang suspek mao ang iyang silingan nga si Adriano Lagnasan Mahilum, 51, backhoe operator sa usa ka pribadong kompaniya.
Matud ni SPO2 Ernesto Pepito sa Liloan Police Station dihang nahinabi sa Banat News naglakaw sa dalan ang bata dihang gitawag kini sa suspek ug dihang miduol ang biktima gikatahong gipangutana kini sa suspek kun gidugo na ba kini apan nitubag ang nauwahi nga wala pa.
Pagkahuman gipangutana na usab sa suspek ang bata kun namukol na ba ang dughan niini ug ning higayuna niangkon ang biktima ug gisultihan dayun sa suspek nga pakuyogon niya kini og kadali.
Apan gidala sa suspek ang biktima sa ngitngit nga lugar ug didto iyaha dayung gipasud ang duha ka kamot sa dughan ug gikumot kini dayon gipanghikap ang mga pribadong bahin sa lawas sa bata.
Ang biktima nga nahadlok way nahimo bisan og nagpakiluoy sa suspek ug maayo nalang kay giapas sa asawa ang suspek ug nakit-an ang gibuhat niini.
Diha-diha nakahigayon og dagan ang biktima pauli sa ilang balay dayong sumbong sa iyang ginikanan ug wa maglangay ug misumbong sila sa kapolisan.
Sila si SPO3 Wendry Pilapil mao nay misikop sa suspek diha sa iyang pinuy-anan. (EIM) (BANATNEWS)