CEBU, Philippines - Gidudahang usa ka druglord ang mipapatay o mipatay sa manag-uyab kansang mga patay’ng lawas nakit-an diha sa kalibunan sa sitio Cansubing, barangay Buagsong sa lungsod sa Cordova sa milabay’ng hapon.
Base sa imbestigasyon ni SPO1 Henry Amores sa Cordova Police Station mibutyag nga nagsentro ang imbestigasyon sa motibong may kalambigitan sa ilegal nga drugas ug love triangle ang hinungdan sa pagpatay nila ni Jennylyn Premacio ug Junard Balorio.
Matud pa ni SPO1 Amores nga nahinabi sa Banat News nga gipakita sila ni Erminda Balorio (igsuon sa biktima) og usa ka mensahe sa text message sa cellphone ni Premacio gikan sa kanhi kapuyo sa babaye.
Sumala pa nga ang unod sa text nagkanayon: “Pangitaan taka’g paagi bayhana ka magkita ra mo ni Satanas, ikaw maoy hinungdan daku kaayo ang nadispalko nga kwarta,” matud pa sa text nga gibasa ni Amores. Ang maong text message giingong gikan sa kanhi hinigugma sa babaye kansang pangalan gipugngan una samtang wala pay klarong imbestigasyon kun may kalambigitan kini sa krimen.
Matod pa daan nang nagpahimangno ang mga igsuon ug kabanay ni Junard nga dili makig-relasyon sa babayeng biktima tungod sa kanhi hinigugma niini nga nalambigit sa ilegal nga negosyo sa drugas.
Samtang si Premacio human madawat ang maong hulga sa text gikatahong mi-text usab sa iyang inahan nga si Gemma Premacio nga nagkanayon nga gusto pa kining mabuhi sa taas pa nga higayon.
Matud pa ni Amores base sa ilang pakisusi adunay kasong murder sa Cordova apan nakapiyansa ang kanhi kapuyo ni Premacio ug ning uwahi lang nalambigit kini sa negosyo sa ilegal nga drugas. (BANATNEWS)