Usa patay sa sunog sa Opra

CEBU, Philippines - Patay ang usa ka lalaki human mapantok ang iyang ulo tunga-tunga sa pag-ulbo sa sunog diha sa ilang dapit sa sitio Opra sa barangay Capitol Site ning dakbayan kagahapon sa kaadlawon.

Ang sunog nga milamoy sa tulo ka panimalay giisa ngadto sa 3rd alarm gikan nadawat sa kabomberuhan ang alarma alas 2:44 sa kaadlawon.

Si SFO1 Ronald Nuez, sa Cebu City Fire Department nagkanayon nga ang kalayo gikatahong diha nagsugod sa pinuy-anan sa namatay nga si Wilfredo Alcordo Jr., kinsa namatay sa tambalanan.

Sumala pa nga si Alcordo nagdali unta sa pagluwas sa iyang mga apo human mamatikdi ang sunog sa ilang balay apan giingong giatake kini sa sakit sa kasing-kasing ug nadakin-as ug naparok ang iyang ulo sa ubos.

Dugang imbestigasyon nga sa kwarto sa 2nd floor sa panimalay ni Alcordo nagsugod ang kalayo apan wala pa matino sa kabomberuhan kung unsay sinugdanan niini.

Sulod sa 12-minutos nga gikombate sa mga mirespondeng mga fire trucks sa Cebu City Fire Department, mga sakop sa Filipino Chinese Volunteer Brigade ug Emergency Recsue Unit Foundation una pa kini nakontrolar.

Matud ni Nuez sa pasiunang pakisusi sa kabomberuhan, ang danyos sa sunog gibana-banang di mominos og P175,000.

Si Kapitan Manuel Guanzon sa Capitol Site nagkanayon nga iyahang i-convene ang konseho sa barangay karung buntag aron i-deklarar nga ilawom sa state of calamity ang nasunogan aron magamit nila ang pundo sa ilang calamity fund.

Matud ni Guanzon nga unom ka balay ang naapektahan apan tulo ra ang nangaugdaw nga gipuy-an sa 21 ka tawo.

Samtang sa pikas bahin, si Kapitan Jovito Taborada sa barangay Lahug kansang usa sa ilang mga sitio nga mao ang sitio Sunset Drive Extention nasunogan usab niadtong Domingo sa hapon gideklarar na nga ilawom sa state of calamity.

Apan iyang giklaro nga ilaha unang gamiton ang kwarta nga pundo sa barangay samtang wala pa maaprobahi sa konseho sa barangay ang pagdeklarar og state of calamity.

Buot sa barangay nga magamit pagpamalit og housing materials alang sa mga nasunogan ang pundo. Moabot sa 43 ka tawo ang namuyo sa lima ka balay nga hingpit nangaugdaw ug sa laing lima nga partially burned nga midanyos og P120,000. (EIM)  (BANATNEWS)