CEBU, Philippines - Mialibwag og panagan ang mga nagduwa og video karera dihang miabot ang mga polis nga mironda didto sa sitio Paglaom, barangay Bulacao, dakbayan sa Talisay niadtong Sabado sa gabii.
Ang maong ronda gilusad sa hiniusang puwersa sa kapolisan sa Cebu Provincial Police Office (CPPO) nga gipangulohan ni Chief Inspector Ciriaco Larrobis ug kapolisan sa Talisay City Police Station nga gipangulohan ni Inspector Hugo Rio Ipong.
Usa ka video karera machine ang naimbargo sa mga polis human kini biyai sa mga sugarol ug walay tag-iya nga miangkon.
Matud sa mga polis nga dihang miabot sila sa lugar ang mga sugarol nga nagtampunsisok sa maong sugalan, tulin pa sa manatad nga mikabad og panagan hinungdan nga walay nasikop sa kapolisan.
Niadtong buwan sa Septiyembre usa ka video karera machine usab ang naimbargo sa kapolisan gikan sa usa ka payag sa barangay San Isidro, sa maong dakbayan.
Kahinumdoman nga kaniadto daghang mga ginikanan nga mireklamo ngadto sa kapolisan ug sa mga opisyal sa siyudad batok sa operasyon sa video karera tungod kay ang ilang mga anak dili na mosulod sa klase kay anha na kini magyampungad og duwa sa video karera diin adto ihurot og posta ang ilang bawon.
Ang hepe sa kapolisan sa Talisay nga si Superintendent Eddie Recamara nagkanayon nga ang sugal maoy usa sa hinungdan nga ang tawo maaghat sa pagbuhat og krimen sama sa pagpangawat aron adunay ikapusta. (BANAT NEWS)