CEBU, Philippines - Si kanhi konsehal Mar Rabaya kinsa tua na karon magpuyo sa Florida, USA mihatag og mga school supplies sa mga kabataang nagtungha sa San Roque Elementary School sa dakbayan sa Talisay dili pa dugay.
Kini ang unod sa iyang suwat nganhi sa Banat News ug sa samang higayon ngadto kang Kapitan Antonio Cabrera Jr. sa San Roque.
Ang pagpanghatag gihimo ni Rabaya atol sa iyang pagduaw sa Talisay niadtong miaging Agosto ning tuiga.
Ang mga butang nga iyang gitunol ngadto sa tunghaang elementarya sa San Roque mao ang 400 kapin ka mga notebook, papel, lapis, ug crayola. Ang maong donasyon gitambayayongan pagtunol usab sa kapikas sa kinabuhi ni Rabaya ug sa iyang mga anak nga gikan sa Amerika, nga gitambongan nila ni Konsehal Ferdinand Rabaya sa barangay Cansojong, mga magtutudlo ug ang principal sa maong tulunghaan.
Matud pa ni Rabaya nga ikaduha na kining higayong mihatag siya og donasyon nga mga notebook, lapis, papel ug crayola sa nahisgutang tulunghaan. Matud pa ni Rabaya nga ang maong donasyon kabahin usab sa proyekto sa iyang asawa nga si Anthonia Rabaya Prossi nga gitawag nga Notebooks of Success didto sa Sarasota, Florida.
Miingon si Rabaya nga ipadayon nila kining maong proyekto matag tuig ilabi na kun makita nila ang kakugi sa mga magtutudlo sa maong eskuylahan. Si Rabaya kinsa lumad gayud nga taga Talisay miingon nga siya ug ang iyang mga anak pulos migraduwar sa San Roque Elementary School, busa dili gayud nila hikalimtan ang maong tulunghaan.
Si Rabaya kinsa usa usab sa mga korespondente sa unang estasyon DYRC ning dakbayan sa Sugbo midayeg usab sa hepe sa barangay tanod nga si Mario Constantino ingon man ang mga barangay health worker nga nanglimpiyo sa kadalanan sa sitio Kimba , San Roque.
Bahin sa pangutana niya sa email ad ning tigbalita, mao kini: wencelen@yahoo.com (BANATNEWS)