Sa Dugang P3 Mil Allowance: Kami diay? - Brgy. Sec. ug treasurers

CEBU, Philippines - Human ipahibalong magdawatan na og binulang allowances ang mga barangay kapitan, barangay kagawad ug mga barangay Sangguniang Kabataan chairmen sa dakbayan sa Sugbu hasta ang 80 ka mga barangay secretaries ug treasurers buot usab nga maapil sa grasya gikan sa City Hall.

Ang maong mga barangay secretaries ug mga tresurero miawhag kang Cebu City Mayor Michael Rama nga apilon sila sa tag P3,000 nga dugang sa ilang monthly honorariums gikan sa siyudad.

Dili palang dugay, si Rama mianunsyong adunay dugang P5,000 monthly allowance ang matag barangay kapitan, P3,000 monthly honorariums sa 720 barangay councilmen ug ‘retroactive’ kini sugod niadtong bulan sa Enero.

Ang mga barangay secretaries ug treasurers mipagawas og manifesto nga gipangulohan ni Punta Princesa barangay captain Jose Navarro miesplikar nga sila maoy tigpangandam ug tighan-ay sa mga gimbuhaton sa mga konseho sa kabarangayan.

“We, barangay treasurers and barangay secretaries, are evidently saddled who the different tasks either assigned to us by our respective barangay captains and members of the council, or those that are congruent to our post,” sumala pa sa manifesto.

Base sa Local Government Code, ang mga secretary ug treasurers   sa LGUs giisip nga mga ranked officials ug katungod nilang makadawat og sweldo sama sa mga sakop sa barangay council.

“We, barangay secretaries and treasurers, bonding together and in unison deeply involved in activities that will redound to the benefit of all of us, be included as duly recipients of the monthly financial assistance as a subsidy stipend to all barangay officials every month,” dugang pa sa manifesto.

Buot usab nila kung kini katugotan sa dakbayan himuon sad kining ‘retroactive’ ug adto na sa bulan sa Disyembre ihatag og tingob. Si Navarro maoy kanhi pangulo sa Association of Barangay Council miendorsar sa maong manifesto tungod sa pagtuong patas gyud unta ang pag-ila sa mga opisyales sa barangay.

Hinuon si Rama daan nang mipahibalong apilon sa dugang binulang allowance ang mga barangay secretaries ug treasurers sa P3,000 additional monthly honorariums.

Apan si Rama nagpaabot pa sa opinyon sa Commission on Audit (COA) bahin sa legalidad sa iyang plano. Ang siyudad nagkinahanglan og gibanabanang P100 milyones alang sa maong plano.

Bisan tuod adunay pagdudang may bulok politika ang plano ni Rama, si Bise Mayor Joy Augustus Young nagkanayon nga wala siya’y pagsupak ug suportahan niya kini.  - BANAT NEWS