CEBU, Philippines - Usa ka 17-anyos nga lalaki ang gibalhog sa karsel human masakpi sa amahan sa 12-anyos nga iyang gisuwayan unta paglugos pasado alas-9 sa miaging gabii sa balay mismo sa suspek diha sa barangay Ibo syudad sa Lapulapu.
Si Mario (dili tinuod nga ngalan) nga molupyo sa maong lugar wala makapanapo dihang nasakpan nga nagpatong na kini sa biktima ug gibunlot dayong gikulata.
Sa imbestigasyon sa kapolisan giingong nag-inom ang suspek sa usa ka tindahan ug dihang nahiagi ang biktima giagda kini sa suspek aron paimnon og bino.
Bisan sa pagbalibad sa bata namugos gyud ang suspek hinungdan nga miinom usab ang bata hangtud nga kini nalipong sa kahubog ug dihang mihangyong magpahatud sa ilaha gidala kini sa suspek sa iyang balay.
Nagtuo ang kapolisan nga aduna gyuy dautang katuyoan ang suspek sa bata maong wala niya kini ihatud sa balay niini.
Apan wala magdahom ang suspek nga nianang mga orasa dihang iyaha nang gisugdan ang dautang tumong ngadto sa biktima nangita na diay ang amahan sa naulahi ug adunay nakahatag og impormasyong gidala kini sa suspek.
Ang amahan sa bata nga midiretso sa balay sa suspek nakasakop sa naulahi nga nagpatong na sa iyang anak hinungdan nga gibunlot niya kini ug gikulata dayon gidala sa presinto. Ang suspek pag-abot sa buhatan sa kapolisan kusganong mihimakak sa mga pasangil kaniya samtang ang bata gidala ngadto sa tambalanan aron ipahiling. (BANATNEWS)