CEBU, Philippines - Malamposong gipahigayon didto sa lungsod sa Sta. Fe sa isla sa Bantayan ang labing unang Air Soft Games on Military Simulation National Tournament didto sa lungsod sa Santa Fe, sa Bantayan Island niadtong Oktubre 22 ug Oktubre 23 ning tuiga.
Sigun pa sa presidente sa Air Soft Games-Cebu Chapter nga si Paulo Garcia nga mao kini ang labing una sa tibuok nasud diin ang mga players sa air soft migamit og Military Simulation sa ilang nasudnong turneyo nga gipahigayon dinhi sa Sugbo.
Matud pa ni Paulo Garcia nga ang maong national tournament gisalmotan sa mga magduduwa sa air soft gikan sa 11 ka mga probinsiya sa nasud.
Ang pagpahigayon sa maong torneyo gihangop pag-ayo ni Sta. Fe mayor Jennifer Illustrisimo kinsa namahayag nga dako kaayo og natampo ang maong duwa sa turismo sa ilang lungsod sanglit nakahatag kini og dugang kainila sa ilang lungsod ug sa tibuok Isla sa Bantayan. - BANAT NEWS