Sa Nob.Uno ug Dos LCPO ug MCPO may pahimangno sa publiko

CEBU, Philippines - Gipahimangnoan sa kapolisan sa dakbayan sa Mandaue ug Lapulapu ang publiko nga moduaw sa mga dagkong sam-ang sa dakbayan nga sundon ang mga gilatid nga pahibalo alang sa ilang seguridad ug hapsay nga pagsaulog sa Todos Los Santos ug Kalag-kalag sa Nobyimbre 1 ug 2.

Si Superintendent Percival Sorilla, deputy chief sa Lapulapu City Police Office (LLCPO) miingon nga higpit nilang gibantayan ang upat ka sementeryo sa dakbayan sa barangay Marigondon, barangay Gun-ob ug barangay Poblacion nga gipaabot nga magdasok ang mga tawo.

Gidili sa kapolisan ngadto sa publiko ang pagdala og ilimnong makahubog, pagdala ug hait nga hinagiban o mga armas nga moboto, gidili nila ang pagsugal sama sa mahjong, baraha, hantak, tsikitsa, tigbakay ug uban.

Gidili sad ang pagdala og mga sound systems nga makamugna og kasaba sa sulod sa sam-ang nga makatugaw na hinuon sa kamalinawon nga kasaulogan.

Dugang pahimangno sa publiko nga kinahanglang siguraduhong sirado ang ilang balay ug giibot ang tanang appliances nga de kuryente kung walay mabiling magbantay.

Samtang si Chief Inspector Michael Bastes, officer-in-charge sa operations branch sa Mandaue City Police Office (MCPO) mipadayag nga walo ka mga sam-ang sa dakbayan sa Mandaue ang ilang bantayan.

Adunay 300 ka polis inabagan sa mga sakop sa Barangay Intelligence Network (BIN) nga ibutang sa mga sam-ang sa barangay Banilad, barangay Guizo ug barangay Canduman.

Si Bastes mipahimangno sa publiko sa pagbantay batok sa mga kawatan, snatcher, mangingilad ug uban pang gituohang nga mopahimulos sa kahigayonan sa maong adlaw.  - BANAT NEWS