3 ka gasang sa Talisay City i-rehabilitate

CEBU, Philippines - Si Konsehal Bernard Joseph Odilao sa dakbayan sa Talisay mipasalig nga ang tulo ka mga marine protected areas (MPAs) sa siyudad makabenepisyo sa $10,000 nga donasyon gikan sa M/V United Majuro.

Giaprobahan sa konseho niadtong Martes ang iyang gidusong sugyot kabahin sa paggamit sa $10,000 nga donasyon sa M/V United Majuro nga nasangad kaniadto sa Lagundi Reef ug nagbilin og dakong danyos.

Ang nahisgutang kwarta gibutang una sa trust fund sa siyudad sukad pa niadtong tuig 2009.

Kahinumduman nga ang kapitan sa nahisgutang Chinese cargo vessel midonar sa maong kantidad sa kwarta human ang barkong iyang gidala misangad diha sa Lagundi Reef sa barangay Poblacion niadtong Marso 5, 2009.

Matud ni Odilao nga ang representante sa MV United Majuro nangutana sa kagamhanan sa Talisay kung unsay gigamitan sa nahisgutang donasyon.

Si Odilao kinsa chairman sa committee on environment nagkanayon nga gawas sa Lagundi Reef ang Pungaton Reef ug Makatol Reef diha sa barangay Tanke ug Pooc ang makabenepisyo usab sa donasyon.

Ang Pungaton nagkinahanglan ma-rehabilitate tungod kay naguba usab ang maong coral reefs niini human ang Weesam Express fastcraft nasangad diha sa lugar niadtong buwan sa Septiyembre niining tuiga.

Si Odilao nagkanayon usab nga ang tulo ka mga coral reefs butangan unya og mga boya ug mga floating guardhouses aron mailhan sa mga moagi nga protektado ang maong mga lugar.

Si Konsehal Danny Caballero vice chairman sa committee on environment nagkanayon nga sa sayo pa unta duna nay gihimong lakang aron dili magkadaku ang kadaot sa mga coral reef.

Si Caballero kinsa ubos sa landong sa oposisyon nagkanayon nga sa milabay’ng mga buwan migama na siya og samang sugyot sa konseho apan gibasura kini.

Si Caballero midugang nga nanghinaot siya nga maimplementar dayon ni Odilao ang pag-rehabilitate sa tulo ka nahisgutang coral reef. - Brenda D. Batuto/EIM (BANAT NEWS)