CEBU, Philippines - Sugod karong buntaga inspeksyonon na sa mga sakop sa Land Transportation Office -7 ang tanang mobiyaheng mga bus pasaheroan sa tanang mga terminal dinhi sa dakbayan tipik sa pagpangandam aron masiguro ang kaluwasan sa bagang duot sa mga pasahero nga mosugod na pagpamauli sa ilang tagsa-tagsa ka lugar nunot ning nagsingabot nga Kalag Kalag karung Martes.
Matud ni LTO-7 Director Raul Aguilus dihang nahinabi sa Banat News unahon nila og inspeksyon ang South Bus Terminal aron mopahigayon og road worthiness test sa mga sakyanan nga mobiyahe.
Gikan didto sunod nga bisitahon sa LTO-7 ang North Bus Terminal, pagkahuman ang Ayala Terminal ug dayun ang City Link Terminal.
Aduna say help desk nga ibutang sa tanang terminal dinhi sa Sugbo ug tibuok Central Visayas aron kadangpan niadtong mga pasahero nga dunay reklamo.
Dugang ni Aguilus mopahigayon usab sila og roadside drug testing aron masiguro nga way makalusot nga mga drayber nga tigamitan og gidiling drugas nga magmaneho aron pagsiguro sa kaluwasan sa mga pasahero nga mobiyahe.
Gawas niini gipahibawo ni Aguilus nga hingusgan nila ang pagpanakop niadtong mga kolorum nga sakyanan nga mamasahero ingon man apil sa dakpon kadtong mga sakyanan nga mag-overloading.
Hinuon wala motug-an si Aguilus kun ang pagpaniid sa mag-overloading anha lang ba susihon sa terminal o diha na sa karsada diin gyud sagad mahitabo ang pag-overload og mga pasahero.
Matud ni Aguilus dakpon sab nila kadtong mga bus pasaheroan nga mobiyahi gawas sa ilang rota nga wa makakuha og special permit gikan sa Land Transportation Franchising and Regulatory Board (LTFRB)-7.
Ang LTO-7 mopakatap usab sugod ugma sa ilang mga personnel ug mga deputize agent nga sakop sa Task Force Alpha. (EIM) (BANAT NEWS)