Pagdug sa pamilya sa piniriso gisuspenso

CEBU, Philippines - Gisuspenso ni Gobernador Gwendolyn Garcia ang mga pamilya sa mga piniriso   sa prisohan sa lalawigan dulgan sa ilang pamilya niining tuiga.

Kini human moeskapo gikan sa Cebu Provincial Detention and Rehabilitation Center (CPDRC) sa barangay Kalunasan ning syudad sa Sugbo si Renante dela Rosa. Si dela Rosa mipuga niadtong Oktubre 21, 2011 apan misurender kini ngadto sa warden sa prisohan ug nahibalik siya sa iyang selda.

Matud pa ni Capitol Consultant on Peace and Order and Security, Ret. Col Cesar Veloso nga ang gobernadora dili na makasalig sa kahapsay ug kalinaw sa CPDRC kun tugotan nga makasulod ang matag pamilya sa mga piniriso ug makauban sulod sa usa ka kagabii atol sa Pasko ug Bag-ong Tuig.

Kini tungod kay ang mga jailguard napakyas man gani sa pagtuman sa ilang katungdanan sa pagbantay sa mga binilanggo niadtong higayon nga mingaw ug walay mga bisita ang mga piniriso, ug nakapuga si dela Rosa, daw unsa kun daghang pamilya sa mga piniriso ang tugotang makasulod sa CPDRC.

Si Veloso miingon nga iyang ipatuman ang gimando sa gobernadora ug higpitan pa niini ang pagbantay sa mga piniriso sa CPDRC.

Samtang gipahibawo ni Veloso nga nagpadayon ang ilang imbestigasyon sa warden sa CPDRC ug sa mga guwardiya sa maong bilanggoan labot sa pagpuga ni dela Rosa ug posibling mapahamtangan kini ug tukmang silot kun mamatud-ang sad-an sa maong imbestigasyon.  - BANAT NEWS