300 ka balay gilunopan sa Madridejos

CEBU, Philippines - Dul-an sa 300 ka mga panimalay ang gilunopan sa baha sa dili muminos tulo ka mga barangay sa lungsod sa Madridejos isla sa Bantayan atol sa pag-igo sa bagyong Ramon sa miaging gabii nga gipaubos sa public storm signal number 2 sa Northern Cebu.

Gibutyag ni PO2 Mamerod Carasina, desk officer sa Madredijos Police dihang nahinabi sa Banat News diha sa barangay Maalat moabot og 250 ka mga panimalay ang gilunopan ug kutob taga hawak sa tawo.

Samtang sa barangay Pili moabot sab sa 37 ka mga balay ang gilunopan ug laing lima ka mga balay sa barangay Malbago ang gibahaan.

Hinuon matud ni Carasina walay naangol o nakalas atol sa kusog nga uwan nga niresulta sa baha niadtong miaging adlaw.

Kagahapon sa alas 8:00 sa buntag si Madredijos Mayor Salvador Sally dela Fuente kauban ang mga sakop sa Municipal Social Services Office mi- apod apod og mga relief goods sa mga naapektahang pamilya.

Si Gob. Gwendolyn Garcia mimando sa Provincial Engineering Office pagpadala og mga heavy equipment sa mga lungsod sa amihanang Sugbo nga apektado sa baha.

Kini sama sa nagubang highway didto sa barangay Gregorio Antigua ug ingon man ang nidahili nga karsada sa sitio Panugnawan barangay Curva lungsod sa Medillen ug laing dalan nga nahunlak sa lungsod sa Borbon.

Samtang didto sa Batanyan nakadawat og report ang buhatan sa gobernador sa nasinati nga flash flood sa barangay Mansilangan ug Polo, Cancaibi, Campingganon, Sellon, Puti-an ug Patao sa Kabak Bantayan.

Nunot niini gi-alerto na usab sa gobernador ang tanang mga private contractor sa mga lungsod sa Northern Cebu nga apektado pag-tabang pagpahigayon og clearing operation.

Samtang walay mga dagkung kadaut nga nasinati sa Sugbo bisan didto sa mga lungsod sa Northern Cebu nga gipaubos sa signal number 2.

Si Daanbantayan Mayor Maria Luisa Loot mibutyag nga wala kaayoy kadaut nga nahatag ang maong bagyo gawas lang sa ginagmay’ng kadaut sa kadalanan tungod sa baha.

Samtang ang City disaster sa Bogo City wala usay na-monitor nga dagkung kadaut epekto sa bagyo.

Si Regional Disaster Risk Reduction and Management Council (RDRMC) head Niel Angelo Sanchez miingon nga ang “Ramon” miusab og direksyon ug dili na mosentro sa Central Visayas.

Adunay report nga naay unom ka mananagat gikan sa Misamis ug upat usab gikan sa Limasawa ang nanga-missing human gikuso-kuso sa bawod ug hangin ang ilang panagatan.

Hinuon sa pasiunang impormasyong nadawat sa RDRMC giingong na-stranded ang maong mga mananagat sa Cogtong, Bohol. - Darrel A. Carumba ug Lesley Caminade ug report ni Monna Mae Romero,PIT Intern/EIM (BANAT NEWS)