CEBU, Philippines - Gipasalig sa jail warden nga walay ‘special treatment’ nga ilang ihatag ngadto kang Bella Ruby Santos ug parehas lamang ang ilang pagtagad ngadto sa ubang mga piniriso sa Naga City Jail.
“We don’t give any special treatment to Santos, who was detained here. She will be treated as what other inmates do,” matud pa ni Senior Jail Officer 1 Pidie Hitalada.
Kagahapon si Judge Ester Veloso miisyu og commitment order kang Santos nga adto kini bilanggoon sa Naga City Jail samtang magpadayon ang pagdungog sa iyang kasong complex crime kalabot sa pagdagit ug pagpatay sa 6-anyos nga si Ellah Joy Pique.
Ang abogado ni Santos nga si Rameses Villagonzalo nagkanayon nga ang korte mipabor nga adto bilanggoon sa Naga City Jail iyang kliyente ug dili sa Cebu Provincial Detention and Rehabilitation Center (CPDRC).
Ang desisyon sa korte gikalipay sa mga kabanay ug inahan ni Santos nga si Perla Erejano tungod kay dali niya kining mabisita.
Si Santos ug iyang hinigugmang British National nga si Ian Charles Griffiths maoy giakusahan sa krimen nga nahitabo niadtong bulan sa Pebrero sa Calajoan sa lungsod sa Minglanilla ug pagkasunod adlaw nakit-an ang biktima (Pique) nga gihulog sa pangpang sa barangay Sayaw lungsod sa Barili.
“Positive because I am near my family, they can easily visit me, negative because the jail was too small,” matud pa ni Santos. Si Santos mitataw nga dili nalang siya mangaway ni Reynante Pique, amahan ni Ellah Joy kay adto nalang sila magkita sa korte.
Si Hilatada nagkanayon nga adunay 91 ka piniriso ang Naga City Jail ug gibuwag og prisohan ang mga lalaki ug babaye. Si Bella maoy ikaupat nilang babayeng inmate.
Sa iyang bahin si Sr. Supt. Patrocinio Comendador, tigpamaba sa Task Force Ellah Joy Pique mihulagway nga ang ‘party issue’ pamaagi sa depensa nga ilang ipalutaw sa publiko nga ang ilang kliyente wala magtagotago.
Si Santos dihang nakahinabi sa mga tigbalita sa pag-abot niini sa Sugbu niadtong Lunes nangangkong nag-party-party ug nagsuroy-suroy ra siya ug wala magtago-tago. (BANAT NEWS)