CEBU, Philippines - Ilusad sa kagamhanan sa lungsod sa Barili ang compost making contest nga salmotan sa tanang mga barangay sa maong lungsod karong umaabot nga Oktubre 14, ning bulana.
Matud pa ni Barili municipal agriculturist Teofanis Baruel nga kining maong programa gitumong aron pagdasig sa tanang mga molupyo sa kabarangayan pagbahig sa malata ug di malata nga mga basura.
Si Baruel maoy gitahasan sa pagpanawat sa mga mosalmot gikan sa barangay category, private, public school elementary ug secondary school category, fisherfolks category, sikad sikad category, farmers ug vendors category.
Si Baruel nitataw nga kining maong proyekto gilusad sa pagpasiugda ni Mayor Teresito “Ondo” Mariñas aron giyahan ang katawhan sa tibuok lungsod sa paghimo og compost pinaagi sa basurang malata.
Gipasabot niya nga sayon ra kining buhaton kay igo ra mang paughon ang mga basurang malata ug mahimo kining abuno alang sa mga tanom nga kapangwartahan usab sa mga molupyo.
Si Mayor Mariñas migahin na og pundo alang sa ganti ning maong kompetisyon nga padaghanay sa compost nga gikan sa basura sama sa dahon sa kahoy.
Matud pa sa mayor nga ang basihan sa pagpili sa mga mananaug mao kadtong kinadaghanan og compost nga mugna sa pinaugang basura nga malata.
Ang ganti alang sa barangay category P7 mil sa 1st prize, P5 mil sa 2nd prize, ug P3 mil alang sa 3rd prize ug bisan ang ubang category gikan sa mga tunghaan, vendors association, kahugpongan sa mga mananagat ug mag-uuma nga category ang makadawat og ganti.
Iniglusad niini karong Oktubre 14 hatagan og taas nga panahon ang mga entrante niini sa paghimo og compost sa ilang palibot ug inig-abot sa Oktubre 2012 mao nay pagpakanaog sa hukom kun kinsay labing daghan og compost nga nahimo.
Nunot niini gidapit ni mayor Mariñas ang tanang sektor gikan sa kabarangayan ug mga mananagat, mag-uuma, kahugpungan sa sikad sikad, vendors ug mga publiko ug pribadong tunghan pagsalmot niini tungod kay gawas sa ganti, makatabang usab kini pagpalambo sa pagpanghimo og abuno nga makatabang sa matag pamilya pagtubag sa inadlaw-adlaw nilang panginahanglan. (BANATNEWS)