Desisyon sa kasong Ecleo karong Dec. 16

CEBU, Philippines - Si Regional Trial Court (RTC) Judge Soliver Peras sa Branch 10 mibutyag kagahapon nga hingpit nang ipakanaog ang desisyon sa hukmanan sa kaso ni Kongresista Ruben Ecleo sa Dinagat Island Surigao del Sur karong umaabot nga   December 16, 2011.

Sa maong adlaw masayran na sa tanan    kun si Ecleo sad-an ba o dili sa kasong parricide gumikan sa pasangil nga siya’y mipatay sa kaugalingon niyang asawa nga si Alona Bacolod Ecleo, napulo na ka tuig ang nakalabay.

Gani, gimandoan ni Peras ang duha ka partido nga isang-at na ang ilang tagsa-tagsa ka memorandum human ang defense counsel mitak-op na sa ilang presentasyon sa   mga saksi. Ang Defense lawyer nga si Orlando Salatandre, mipresentar sa ilang kataposang surrebuttal witness nga si Margie Pasquil, katabang sa pamilyang Ecleo aron maoy mopamatuod nga walay sala si Ecleo ug gub-on ang gipahayag sa testigo sa prosecution nga si Josebil Bacolod kinsa lig-ong mipasangil nga si Ecleo gyuy mipatay kang Alona Ecleo nga igsoon   sa maong saksi. 

Si Pasquil nga usa ka sakop sa PBMA sukad sa iyang pagkatawo mitestigo nga niadtong Enero 4 ug 5 tuig 2002 diha siya sa panimalay ni Ecleo sa Banawa ug wala siya makakita ni Josebil, sukwahi sa gibuhiang pamahayag sa naulahi nga diha kuno siya (Josebil) sa maong panimalay sa pamilyang Ecleo sa maong higayon.

Matud pa ni Pasquil nga nianang Enero 5 sa susamang tuig aduna silay daghang bisita nga miabot sa panimalay sa pamilyang Ecleo sukwahi usab sa pamahayag ni Josebil.

Midugang si Pasquil nga sa mao ra usab nga adlaw (Jan. 5) si Alona ug ang iyang igsuong si Ben mibiya sa ilang balay aron mag-outing ug giingong wala na kini mahibalik nianang Enero 6, nga gipamatud-an usab kuno sa ilang security guard niadtong higayona nga  ginganlan og Noli.

Kini sukwahi sa testimonya ni Josebil kinsa mibutyag sa korte   nga niadtong Enero 5, 2002 nakadungog siya sa singgit ni Alona nga nangayo og panabang sa sulod sa kuwarto niini.

Hinungdan nga midali siya pagdagan sa master’s bedroom aron pagsuta kun sa iya ba gyung igsoon nga si Alona ang maong singgit.

Apan sa pag-abot niya sa maong lawak sa magtiayon, iyang nakit-an si Ecleo nga wala nay t-shirt ug naligo sa singot ug uban sa bodyguard niini nga si Jorebil Panadero migawas sila sa balay nga nagbitbit na og plastic bag nga gibutang sa compartment sa sakyanan.

Unya ang maong plastic maoy nakit-an nga naglutaw sa dagat sa habagatang bahin sa lalawigan nga gisudlan sa wala nay kinabuhi niyang igsoon sumala pa ni Josebil.

Si Peras sa iyang pamahayag nagkanayon nga kining tanan maoy gitimbang-timbang karon sa korte ug masayran na sa publiko ang ilang desisyon karong umaabot nga Disyembre 16, 2011. (WC) (BANATNEWS)