17-anyos na-hit and run patay

CEBU, Philippines -  Patay diha-diha ang usa ka 17- anyos nga dalagita human madagit ug nadaro ug nalatayan sa ligid sa nag-hit and run nga sakyanan samtang kini nag-atang og kasakyan daplin sa karsada sa highway sa barangay Sabang siyudad sa Danao kagahapon sa alas 2:30 sa kaadlawon.

Ang biktima nga patay gyud diha-diha mao si Charmane Estenzo Badayos, 17, tinun-an sa high school nga taga sitio Malbago, barangay Luyang lungsod sa Carmen.

Samtang ang nakaligis kaniya usa ka closed van nga kolor puti kansang plate number wala makuha.

Subay sa imbestigasyon ni SPO1 Renante Manulat ang traffic investigator sa Danao City Police Station dihang nahinabi sa Banat News ang biktima kauban sa laing duha pa ka mga babaye nag atang og traysikol paingon nga mamauli.

Gituohan nga gikan sa barangay Maslog ang biktima tungod kay fiesta niadtong higayuna sa maong lugar.

Sumala pa nga diha gyud nagbarog sa daplin sa karsada ang biktima dihang kalit nadumbolan sa naghaguros nga van hinungdan sa pagkaguyod niini sa atubangan ug naguroy og pipila ka metros dayon nalatayan sa ligid.

Apan imbes nga mohunong aron tabangan ang biktima mipasirit hinuon palayo ang maong van sa direksyon sa dakbayan sa Sugbu. Patay dihadiha ang biktima.(EIM)(BANAT NEWS)