Batan-ong tulisan nagbasol

CEBU, Philippines -  Gibasolan sa usa ka estudyante ang iyang pagpanulis sa   usa ka drayber sa taxi nga iyang gisakyan   nga maoy nakapapriso kaniya karon sa bilanggoan sa kapolisan sa dakbayan sa Lapulapu.

Si Richard Gallarte, 18, taga sitio Langub, barangay Poblacion, dakbayan sa Lapulapu, ug usa ka taligraduwar na sa high school naghilak nga misugilon sa mga tigbalita sa iyang kabalaka nga dili na siya makagraduwar karong sunod tuig tungod sa salaod nga iyang nahimo.

Ang maong suspetsado nasikop sa kapolisan human moreklamo ang drayber sa taxi nga iyang gitulis niadtong Domingo sa gabii   didto sa barangay Gun-ob, sa maong dakbayan. Si Rogelio Noynay, 39, drayber sa Revolution Taxi misumbong sa kapolisan nga nagpadagan siya sa iyang sakyanan didto sa Lapulapu sa alas 10:00 sa gabii dihang gipara siya sa suspetsado ug nagpahatod ngadto sa barangay Gun-ob.

Samtang nagdagan ang taxi nausab ang hunahuna sa suspetsado ug mimandar na usab kining magpahatod sa barangay Canjulao.

Apan dihang nahiabot sila sa awaaw nga lugar sa Gun-ob, ang suspek kalit nga milanit sa iyang kutsilyo dayong tion niini ngadto sa liog sa biktima.

Ang biktima nga daan nang nagpraktis sa kaugalingon pagsalbar niini kun may tulis nga mahitabo dali kaayong nakalihay dayong ambak gikan sa iyang taxi ug misutoy og dagan pahilayo niini. Dihang nahiabot siya sa usa ka gasoline station nagpakitabang siya sa mga kawani niini pagtawag og polis.

Wala hiabti sa kapolisan ang suspek apan   dihang milibot sila sa Gun-ob didto nakita niya ang batan-ong tulisan   nga naglakaw ug positibo kining giila sa biktima, busa nasakmit ang kutsilyo nga iyang gigamit sa pagpanulis.

Karong mikagulkol na siya sa prisohan, masulob-on siyang naghinuktok ug nagpanlingo tungod kay wala   siya makatulis og kuwarta, unya napriso pa gyud siya, puwerting dimalasa. Si Noynay agresibo kaayong mokiha batok sa suspek bisan kun wala kini makuhai og kuwarta sa naulahi, sa tuyo niya nga motagam ang maong tulisan. (BANAT NEWS)