Gisulong ang bangko

CEBU, Philippines — Usa ka 51-anyos nga tricycle driver ang gidakop human niya gisulong ug gikatahong gibuak gamit ang martilyo ug maso ang bildo nga pultahan sa usa ka bangko sa Barangay East Poblacion, Dakbayan sa Naga, alas 10 sa buntag niadtong Sabado, Oktubre 24.

Ang suspetsado nga giila lamang sa alyas nga “Gin,” residente sa Purok Liko, Barangay Naalad, Naga City. Walay impormasyon kung unsa iyang tuyo sa maong bangko.

Base sa imbestigasyon sa kapulisan, miadto ang suspek sa bangko nga nagdala og martilyo ug maso diretsong gibuak ang pultahan sa establisemento.

Ang mga tawo nga nakakita sa nahitabo mi-report dayon sa mga pulis nga nadestino sa duol nga police outpost. Dali usab nga niresponde ang mga pulis ug gidakop ang suspek.

Sa unang report bahin sa insidente, nakita sa mga video nga mikaylap sa social media ang lalaki nga misulod sa bangko human mabuak ang bildo nga pultahan.

Naabtan pa siya  sa mga mirespondeng mga polis dia sa sulod sa maong bangko samtang nagkupot sa maso. Gihangyo sa mga otoridad ang lalaki nga mogawas sa bangko.

Apan atol sa komprontasyon, gihagit pa niya ang mga pulis nga pusilon siya ug giingong nangangkon nga iya ang bangko.

Kadugayan, gibuhian sa lalaki ang iyang gigunitang maso ug migawas sa bangko diin gidakop siya sa mga otoridad.

Narekober gikan sa suspek ang martilyo ug maso nga gigamit sa insidente. Gidala siya uban sa mga nakumpiskang ebidensiya sa Naga City Police Station alang sa tukmang proseso.

Sa pagkakaron, giandam sa kapulisan ang kaso nga malicious mischief batok sa suspek tungod sa pagkaguba sa bildo nga pultahan sa bangko. (BANAT NEWS)