CEBU, Philippines - Patay ang usa ka 4-anyos nga batang lalaki ug naangol ang 5-anyos nga maguwang niini human naligiran sa mga bato ug yuta sa gikubkob sa ilang amahan aron unta tukoran sa ilang balay sa bukirang bahin sa barangay Cabungajan sa siyudad sa Danao niadtong Sabado sa hapon.
Apan kagahapong adlawa lang kini na-report diha sa kapulisan.
Ang batang patay na pag-abot sa Danao City District Hospital ang 4-anyos nga si Johnrey Merlina Labador, 4, samtang nasamad ang tiil ug napi-ang ang maguwang niining 5- anyos ug laing duha ka ig-agaw.
Matud ni SPO1 Bryan Batiquin, imbestigador sa Danao City Police Station nga nahinabi sa Banat News gikabkab sa amahan sa mga bata ang yuta duol sa ilang payag aron unta tukoran sa ilang panimalay.
Samtang nagkubkob ang amahan sa yuta pagpatag sa lugar milipot ang mga bata ug natungod sa gikabkab nga yuta nga ug didto nagduwa.
Apan samtang nagkabkab ang amahan sa mga bata nga si Judito aksidenteng naluka ang yuta ug mga bato sa ibabaw nga bahin sa mga bata ug natabunan ang 4-anyos.
Diha nalang nabantayan sa amahan ang nahitabo dihang misinggit ang 5-anyos niini nga anak ug ang mga ig-agaw nga nangayo og panabang diha sa ubos. Milanat pa og pipila ka minutos una pa naugkat ang biktima.
Daling gidala ang mga bata sa Danao City District Hospital apan gideklarar nga Dead on Arrival si Johnrey tungod sa kadaut nga nahiagoman sa iyang ulo nga naigo sa mga bato ug nasamad ang tiil sa 5-anyos nga maguwang. (EIM) (BANATNEWS)