Gikan sa party misaliring patay

CEBU, Philippines - Patay ang garbage collector sa dakbayan sa Toledo human mabangga ang motorsiklo niining gisakyan samtang paingon na unta kining mopauli gikan sa usa ka party diha sa highway sa barangay Ibo sa dakbayan sa Toledo kagahapon sa 1:00 sa kaadlawon.

Ang patay nang nadangat sa tambalanan mao si Oscar Ruben, 43, nagpuyo sa barangay Bato Toledo ug kaswal nga kawani sa Toledo City Hall isip garbage collector.

Matud ni Lorencio Doleno, paryente sa biktima nga market inspector sa Toledo City Public Market dihang nahinabi sa Banat News nga gikan sila sa party sa usa ka resort sa barangay Tajao nga gipanag-iya ni mayor Aurelio Espinosa.

Apan si Ruben nga niana nang pagkahapon nagsakay sa iyang motor aron mopauli apan mihapit sa videokihan sa Poblacion ug nagpadayon ug inum kauban sa mga barkada.

Sumala pa sa traffic division sa Toledo City Police Station lawom na ang gabii dihang mipauli luwan sa iyang motorsiklo si Ruben ug tungod kay nakainom misarasay kini ug mibangga sa puthaw nga railings daplin sa karsada ug maoy nakaingon sa disgrasya.

Tungod sa kakusog sa dagan niini nalabay ang biktima ug nabunal ang ulo ug kalawasan sa dalan ug patay na pag-abot sa tambalanan. (BANATNEWS)