CEBU, Philippines - Gitulis sa nagbinugtong nga armadong lalaki ang usa ka bakery didto sa barangay Lourdes sa dakbayan sa Bogo kagahapon sa alas 2:40 sa kaadlawon.
Ang nabiktima sa pagpanulis mao ang Gals Bakery nga nahimutang sa maong lugar nga gibantayan sa kaherang si Arlene Clarin,18, ug sa helper niini nga si Mauricio Jumao-as, 21.
Matud ni PO1 Velez Israel sa Bogo City Police dihang nahinabi sa Banat News nakatagpilaw ang duha samtang nagpaabot og customer dihang mibutho ang nagbinugtong nga tulisang armado og wala matinong kalibre sa armas.
Mao nalay namathan ni Clarin nga diha na sa iyang tungod ang tulisan nga nagtion og armas dayong deklarar og tulis ug sa kahadlok sa biktima gihatag niini ang halin nga P2,700.
Dali dayong miikyas ang tulisan nga misakay og motorsiklong gimaneho sa laing lalaki dayong sibat palayo samtang ang biktima igo nalang nagpa-blotter sa hitabo.(EIM) (BANATNEWS)