CEBU, Philippines - Patay ang 5-anyos nga batang babaye human napunggit og sakyanan nga gimaneho sa usa ka opisyal sa Bantayan Island Power Corporation diha sa highway sa barangay Pooc sa lungsod sa Sta. Fe isla sa Bantayan kagahapon sa alas 7:50 sa buntag.
Ang biktima mao si Sarah Mae Jumala Cabrera, 5, molupyo sa sitio Matiamban barangay Okoy Sta. Fe.
Samtang ang nakaligis niya mao ang Toyota Revo nga gimaneho ni Seph Oliva Bitoon, 33, taga lungsod sa Compostela ug maintenance supervisor sa Bantayan Island Power Corporation.
Matud ni SPO1 Sheila Illustrisimo sa Sta. Fe Police Station dihang nahinabi sa Banat News sa sakyanan gikan sa Sta. Fe wharf ug paingon sa Bantayan Proper dihang ang bata kalit milabang sa dalan ug nadasmagan kini.
Daling mihunong ug gikarga ni Bitoon sa sakyanan ug gihatud sa Bantayan District Hospital ang bata apan paglabay sa usa ka oras namatay kini tungod sa seryusong kadaut sa ulo niini ug ubang bahin sa lawas pagkabunal sa sementadong karsada.
Si Bitoon boluntaryong mitahan sa kaugalingon samtang gihikay na ang kasong ipasaka sa kapulisan. (BANATNEWS)