CEBU, Philippines - Pormal nang milingkod kagahapong adlawa ang bag-ong regional director sa Police Regional Office-7 nga si Chief Supt. Marcelo Garbo human sa gipahigayong turnover of command diha sa Camp Sergio Osmeña kagahapon sa buntag.
Ang pinasidunggang dinapit mao si PNP Chief Nicanor Bartolome kinsa classmate sa kanhi Regional Director nga si Chief Supt. Ager Ontog Jr. kinsa adto na madestino sa Camp Crame aron ma-promote na ngadto sa pagka 2-star general ning mosunod nga mga semana.
Si Bartolome sa iyang mensahe kagahapon nagkanayon nga si Ontog maoy magsilbing inspirasyon ug hagit sa bag-ong milingkod nga si Garbo. Nagtuo si Bartolome nga si Garbo dunay igong katakos nga modumala sa kapulisan dinhi sa rehiyon ug mapatuman niini ang iyang ten-point agenda aron mapalambo pa ang serbisyo ngadto sa katawhan.
Gawas niini gidayeg usab ni Bartolome ang kapulisan dinhi sa rehiyon sa maayong serbisyo sa katawhan ilabina dinhi sa dakbayan sa Sugbu human napiling best junior police officer lukop nasud si Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO).
Gipasalamatan usab niini ang tulo ka mga pulis nga sila si PO1 Elrich Catacutan, PO1 Roy Ceniza ug PO1 Ernesto Silva, sakop sa Mobile Patrol Group (MPG) CAR 019 kinsa nakigpinusilay sa grupo ni Dionesio Cabatingan alyas Junjun Cabando ang lider sa Quiapo-Cabando Robbery Group nga mitulis sa teller sa China Bank sulod sa Robinson department Store niadtong Septiyembre 5. Tungod niini, nipasalig si Bartolome nga ang PRO-7 dunay todong suporta nga ihatag sa Campo Crame.
Iya hinuong gihagit si Garbo nga mas maayong paus-osan pa ang crime volume sa rehiyon ilabi na dinhi sa Sugbu ug dakpon kadtong mga most wanted persons kay sila hulga sa publiko.
Gani matud pa niya nga usa na niini si Kong. Ruben Ecleo, lider sa PBMA, nga buot niyang ipadakop kun ugaling makit-an dinhi sa Sugbu.
“Wala tay gipili basta naay WOA kailangan silang arestohin,” matud pang Bartolome. (Rey B. Pasaporte/EIM) (BANAT)