PNP-Media mipirma'g mou

CEBU, Philippines -  Gipirmahan na kagahapon sa udto tali sa kadagkuan sa kapulisan dinhi sa rehiyon siyete ug sa city ug provincial directors ug media ang memorandum of understanding (MOU) kabahin sa kung unsay buhaton sa isi’g ka habig panahon nga dunay mahitabo sama sa hostage crisis.

Ang pinirmahay sa MOU didto gipahigayon sa Roof Deck sa Harolds Hotel diin unang mipirma si outgoing PRO-7 Chief Ager Ontog, Cebu Federation of Beat Journalist (CFBJ) president nga si Elias Baquero ug gisaksihan sa mga directors sa kapulisan dinhi sa dakbayan ug probinsya ug sa Metro Cebu.

Lakip sa misaksi ang presidente ug bise presidente sa PNP Defense Press Corps nga sila si Chito Aragon ug Arnold Bustamante.

Si Ontog nga nahinabi sa mga tigbalita nagkanayon nga nindot kaayo ang unod sa maong MOU nga naghatag og kasigurohan sa kapulisan ug media ingon man sa mga nalambigit sa hitabo.

Gikasabutan nga ang PNP maoy mangita og lugar alang sa mga reporters nga mo-cover sa mga dagkong hitabo nga dili mabutang sa peligro samtang naghatud og kasayuran sa publiko ug dili malawgaw ang operasyon sa kapolisan.

Giklaro hinuon diha sa MOU nga wala kini silot sa bisan kinsang sakop sa media nga makalapas niini apan ang importante nga luwas ang tanan.

Ang MOU gihimo aron di masubli ang nahitabong hostage crisis sa miaging tuig sa kaulohan diin siyam ka mga Hongkong tourist ang napatay sa mi-hostage kanilang usa ka kanhi sakop sa PNP.

Alang kang Ontog nga ang respeto ug pagsinabtanay tali sa kapulisan ug media mao nalang ang ipatigbabaw panahon nga dunay panghitabo.

Apan si Atty. Ruphil Bañoc sa Kapisanan ng mga Broadcaster ng Pilipinas (KBP) wala mopirma sa maong MOU kay para kaniya nga usa kini ka kalapasan sa self-regulation sa KBP.

Dugang pa niya nga ang KBP Code paigo na aron iregulate ang ilang mga miyembro kun mokober og mga balita. Apan mirespeto siya sa mga estasyon o ubang sakop sa media nga mipirma sa maong MOU. (BANATNEWS)