CEBU, Philippines - Human sa kontrobersya nga mitumaw niadtong Domingo didto sa Corona Del Mar sa barangay Pooc sa dakbayan sa Talisay ang igsuon ni Gob. Gwendolyn Garcia nga si Byron Garcia mitahan kini sa iyang AK-47 niadtong Lunes sa hapon sa buhatan sa Firearms Explosives Security Agencies Guards and Supervision Section (FESAGSS).
Si Supt. Rex Derilo, hepe sa FESAGSS-7 mitug-an sa mga tigbalita nga posibleng nakamatikod si Byron nga ilegal gyud ang pagdala niya sa maong armas hinungdan nga iyaha nalang kining gitahan.
Si Garcia (Byron) inubanan sa barangay kapitan sa Pooc sa dakbayan sa Talisay nga si Doroteo Emit mitahan sa maong armas nga giingong gigamit ni Byron sa paghadlok sa Amerkanong residente sa Corona Del Mar Subdivision nga si Wayne Morris.
Giklaro ni Derilo nga walay katungod si Byron sa pagdala sa maong armas sanglit ang Chief PNP ra maoy makaisyu og permit to carry firearms outside of residence (PTCFOR) sa mga tag-as nga kalibre sa armas sama sa rifles ngadto lamang sa gobernador, huwes ug ingon man sa mga sakop sa Executive Department. Wala niini si Byron.
Gidugang ni Derilo nga ilaha karung gisusi kun duna bay lisensya ang armas ni Byron tungod kay ilaha kining ipa-revoke ug kabahin sa PTCFOR si Derilo nagkanayon nga sukad pa sa milabay’ng tuig wala nay giisyu niini.
Giklaro ni Derilo nga bisan kun lisensyado ang armas ni Byron dili kini makalingkawas sa kasong administratiba o kriminal.
Si Chief Supt. Ager Ontog, pangulo sa kapulisan dinhi sa Central Visayas mimando na ngadto sa kapulisan sa dakbayan sa Talisay nga moduso og incident report kabahin sa nahitabo niadtong Domingo. Matud ni Ontog nakadawat siya og impormasyon nga dunay lisensya ang AK-47 ni Byron human sa hitabo apan buot niining matino kung aduna ba kini PTCFOR.
Gipasalig ni Ontog nga dili nila hatagan og special treatment si Byron ug kun mapamatud-ang nakalapas sa balaod dili magpanuko ang PNP sa pagpatuman sa balaod bisan paman nga miyembro si Byron sa usa ka prominenteng pamilya sa probinsya sa Sugbu.
Nagubot ang maong subdivision tungod sa wala pagsinabtanay sa homeowners nga mikuha og kaugalingong security agency ug ang developer nga Filinvest Land Inc. nga aduna say kaugalingong gwardiya. Ang duha ka habig padayon pa sa ilang husay kabahin sa maong hitabo. Ug Ma. Yvonne Sanico EIM (BANAT NEWS)