CEBU, Philippines - Mokabat sa P350 mil ang gibana-banang danyos sa mga balay nga nangaugdaw human miigo ang sunog sa miaging gabii diha sa sitio Baca sa barangay Apas siyudad sa Sugbu.
Nadawat ang alarma sa kabomberohan alas 6:25 diin gipaubos dayon sa general alarm ug milanat pa og 35-minutos una makontrolar apan 19 ka balay ang naugdaw ug duha ang partially burned.
Si FO3 Jun Regasa, fire investigator nga gikahinabi sa Banat News nagkanayon nga diha nagsugod ang sunog sa ikaduhang andana sa gipaabangang balay nga gipanag-iya ni Andres Maga.
Matud ni Regasa nga wala diha ang nag-abang nga sila si Naldo Manan-og ug Roel Avenido tungod kay tua sa trabahoan apan nabilin ang bayaw ni Manan-og nga si Jappy Compra ug ang igsuon ni Avenido nga si Renneth.
Matud ni Regasa nga mitug-an kanila si Compra nga kalit lang milanog ang buto sa ikaduhang andana sa balay ug wala magdugay misilaob dayon ang kalayo.
Sa gihimo nilang pakisusi nasuta nga 19 ka mga balay ang hingpit nga naugdaw samtang duha ka balay ang partially damage ug giingong adunay batang napaso. (BANATNEWS)