CEBU, Philippines - Patay diha-diha ang usa ka minero human gibulit og bala ang kalawasan sa wala pa mailhing mga kriminal samtang kini naglakaw sa ngitngit nga bahin sa barangay road sa bukirang bahin sa barangay Balaas sa lungsod sa Argao niadtong Miyerkules sa alas 9:00 sa gabii.
Ang biktima nga namatay diha-diha mao si Rolando Telebrico, 34, minero sa usa ka coal mine nga gipanag-iya sa usa ka Roberto Go nga nagbase sa maong lugar ug nagpuyo sa barangay Ablayan sa lungsod sa Dalaguete.
Sumala pa sa kapolisan duha ka mga wala mailhing mga lalaking nagsakay og motorsiklo ang responsable sa pagpamanhig.
Matud ni PO2 Bernie Lao sa Argao Police dihang nahinabi sa Banat News subay sa imbestigasyon naglakaw na padulong sa minahan ang biktima dihang pag-abot sa ngitngit nga bahin sa maong lugar kalit kining gibabagan sa nag-atang nga duha ka lalaking sakay og motorsiklo.
Ang angkas maoy mipusil makadaghang higayon sa biktima nga naigo sa lain laing bahin sa lawas lakip na sa liog ug tiyan nga nakaingon sa iyang kamatayon.
Ang mga polis nga mi-responde sa alarma nakaabot pa sa mga bata sa maong lugar nga nagduwa-duwa sa mga nakaplagan nga basiyo sa bala sa armas nga gigamit sa mga kriminal apan duha nalang kini ka kabhang sa kalibre .9mm pistol ang na-recover sa kapulisan.
Ang kapulisan naglisod pa og establisar sa motibo sa krimen ingon man pag-ila sa mga gikatahapan.
Personal nga kakulian o may kalambigitan sa trabaho ang sentro sa gitutukan nga motibo sa nagpadayong imbestigasyon apan gikonsiderar usab ang ubang anggulo. (BANATNEWS)