Climate change nakapatubo sa dagat

CEBU, Philippines - Gikabalak-an sa mga tinugyanan sa panahon ang pagtubo sa dagat gumikan sa   pagpanghilis na sa mga bungtod sa yelo kon ice sa ubang kanasuran   mugna sa climate change.

Si Regional Director Oscar Tabada sa Philippine Atmospheric Geophysical and Astronomical Services Administration PAGASA   atol sa Kapihan sa PIA kagahapon nagkanayon nga   gumikan niining maong kahimtang delikado kaayo ang mga lunop ug landslide nga mahitabo sa nagkalainlaing dapit sa kalibotan.

Kini tungod kay adunay mga bunok sa uwan nga hilabihan kadaghan   sa tubig nga lahi na kaayo sa naandang bundak sa uwan sa nanglabay’ng katuigan.

Ning maong kahimtang giawhag ni Tabada ang kagamhanan sa dakbayan sa Sugbo nga angayang momugna og plano sa pagmuntar og maayong drainage system niining dakbayan.

Kini pinaagi sa pagpanaod og mga dagkong imbornal nga sayon kaayong mosuyop sa tubig sa uwan nga ipabuhagay ngadto sa dagat.

Nasayran nga dinhi sa dakbayan may lima ka mga lugar nga lunopanan   ug 19 usab ka lugar ang dahilianan sa yuta   sa panahong mobundak ang kusog nga uwan, sumala ni Ed Llamedo, ang hepe sa public affairs office sa DENR 7 kinsa mitambong usab sa maong forum. Gumikan niini gipalihok na pag-ayo sa Office of Civil Defense ang mga opisyal sa barangay sa maong mga lugar aron makahimo dayon   og lakang sa pagpakibra o pagpamenus sa risgo sa kinabuhi sa panahong moabot  ang panahili sa yuta ug lunop mugna sa kusog nga uwan.

Si   Niel Angelo Sanchez sa Office of Civil Defense (OCD) kinsa mitambong usab sa nahisgutang Kapihan sa PIA nagkanayon nga gibansay na nila pag-ayo ang tanang opisyal sa barangay kauban sa mga tanod aron makatabang   dayon sa katawhan sa ilang tagsa-tagsa ka lugar nga duawon sa mga katalagman nga mugna sa kinaiyahan.

Si Tabada sa iyang bahin midugang nga kun ang dagat dinhi sa dakbayan sa Sugbo   nakatubo na pag-ayo karon, anhi gamita sa kagamhanan   ang tukmang plano sa pagpahimutang og tukmang matang sa imbornal aron makapabuhagay sa tubig sa uwan direkta ngadto sa dagat ug masanta ang lunop.   - BANAT NEWS