Mga sundawo sa CENTCOM di ipabalhin

CEBU, Philippines - Giaprobahan na sa Regional Peace and Order Council (RPOC)7 ang resolution ni Governor Gwendolyn Garcia nga dili ipabalhin ang sakop sa militar nga nadestino dinhi sa AFP Central Command.

Sa maong resolusyon gihangyo usab sa gobernador ngadto sa mga sundawo nga nabalhin na sa laing rehiyon ipabalik dinhi sa Central Visayas.

Kini tungod kay alang kang Garcia dako kaayo kini og gamit alang sa pagpatunhay sa kahapsay ug kalinaw sa mga probinsiya sa Central Visayas ilabina ang pagpatunhay sa kampanya batok sa   insureksyon.

Matud pa ni Garcia nga ang mga sundawo sa AFP Central Command dako kaayo og papel sa paghimo sa lalawigan sa Sugbo nga insurgency free human niya ideklarar ang all-out war batok sa mga rebelding New Peoples Army (NPA).

Ang gobernadora miingon nga bisan og luwas na karon gikan sa hulga sa mga rebelde ang probinsiya sa Sugbo apan ang mga sundalo sa CentCom dako kaayo og matabang sa ubang mga probinsiya sa Tungatungang Kabisay-an..

Tungod niini, ang bag-ong chairman sa RPOC-7 nga si Governor Edgardo Chato    sa Bohol miuyon usab sa maong tinguha ni Garcia ug gipaluyohan usab kini sa kinatibuk-ang miyembro sa nahisgutang konseho.

Ang maong resolusyon ipadala unya ngadto sa buhatan sa labaw nga opisyal sa AFP sa kaulohan.  - BANAT NEWS