Matag kapitan makadawat og P60 mil

CEBU, Philippines - Gipaabot nga magmaya ang   80 ka kapitan sa siyudad sa Sugbo karong Disyembre kun matuman ang gisaad ni Mayor Michael Rama nga ihatag na kanila ang P60 mil gikan sa gisaad niining tag P5 mil matag buwan ang   financial assistance sa matag kapitan sa barangay sukad niadtong Enero ning tuiga.

Sumala pa ni Kapitan George Rama sa Basak San Nicolas nga dako na kaayo og matabang ang P5,000 nga financial assistance matag buwan sanglit kasagaran sa mga opisyales sa barangay nagtrabaho bisan unsang orasa   sa ilang  barangay.

Gawas sa kapitan, ang kagawad sa barangay makadawat usab og financial assistance nga P3,000 matag buwan busa matag usa kanila makadawat usab og   P36,000 karong Disyembre.

Nasayran nga ang mga opisyales sa barangay maoy unang kadangpan sa mga tawo.

Sumala pa ni kapitan Michael Gacasan sa Barangay Guadalupe nga   ang mga opisyales sa barangay   walay gipiling oras sa pagtubag sa panginahanglan sa katawhan busa tunga mang gabii, kaadlawon, maglinog man   ug magbagyo o kaha sunog ug tanang katalagman nga mohulga sa barangay, way laing unang makita ang nagbangutang   katawhan gawas sa mga opisyal sa barangay nga kugihan.

“Dunay mga panahon nga dunay mga tawo nga nanginahanglan og palit og tambal, magpasalamat ta nga dunay financial assistance ang mga kapitan, kay duna dayon ta’y mahatag sa mga tawo,” matud pa ni Gacasan.  - BANAT NEWS