CEBU, Philippines - Gipahibalo ni Senior Supt. Anderson Comar sa Cebu City Fire Department nga mohimo siya og joint inspection uban sa mga representante sa Visayas Electric Company ug Metro Cebu Water District alang sa mga poste ug fire hydrants sa siyudad sa Sugbo.
Sumala pa ni Comar nga sa 333 ka fire hydrants dunay 16 ang wala na mag-andar ug laing kapin sa 20 ang nasutang dunay deperensya ug angay nga ayohon gumikan kay natabonan na kini sa mga kahoy ug bungbong.
Dugang pa niya nga magpatabang usab sila sa VECO kung unsay buhaton panahon nga dunay sunog ilabi na ang kabahin sa pagputol dayon sa linya sa kuryente.
Lakip sa gustong mahitabo ni Comar mao nga kinahanglang konektado ang komunikasyon sa VECO diha sa BFP.
“Usa lang na sa atong option, duna pa’y laing pamaagi, mo-connect sila sa atong radio communication, aron kung dunay alarma, maka-responde dayon sila,” sumala pa ni Comar.
Sumala pa ni Comar nga duna sila’y firefighters kaniadto ang maantigo sa pagkatkat sa poste panahon sa sunog apan nabalhin na sila karon sa laing dapit.
Samtang nakakuha na si Comar og mapa sa siyudad sa Sugbo nga nagtudlo sa fire hydrants ug sayon na lang ang pag-locate nila kung dunay sunog. - BANAT NEWS