CEBU, Philippines - Si Gobernador Gwendolyn Garcia misaad sa mga Naganhon nga iyang pabahaan sa mga hinabang gumikan sa dakung pagsalig niini kaniya.
Si Garcia mipabuhagay sa iyang pasalamat ngadto sa taga Naga gumikan kay gihatagan siya niini og mabulokong kadaugan sa piniliay niadtong tuig 2004.
Matud sa gobernadora nga dili niya makalimtan ang taga Naga busa unsa may mga proyekto nga iyangungo niini sa Kapitolyo andam niyang ibubo ang tanang rekurso sa Kapitolyo aron katabangan ang maong dakbayan.
Si Garcia kauban ni Kongresista Eduardo Gullas sa unang distrito sa lalawigan sa Sugbo kinsa dinapit sa taga Naga sa pagsaulog sa ilang ika-upat nga charter day sa pagkadakbayan niini.
Gibutyag ni Gullas nga andam siyang mosuporta kang Garcia kun mokandidato kini sa nasudnong posisyon sa umaabot nga piniliay.
Kini tungod kay nagtuo si Gullas nga labi pa unyang makatabang sa Sugbo ang gobernadpr kun maghupot na kini og taas nga katungdanan sa nasud. (BANAT NEWS)