Fratman gipusil sa kaaway

CEBU, Philippines - Patay ang giingong sakop sa Alpha Kappa Rho fraternity human kini pusila sa iyang silingan samtang sila naglalis niadtong Huwebes sa gabii diha sa barangay Central Biasong, dakbayan sa Talisay.

Patay diha-diha si Mark Anthony Alvarez, 28, residente sa maong dapit human kini pusila sa iyang silingan nga si Alexander Abendan, 26, kinsa daling misibat human sa hitabo ug padayon pang gipangita sa mga polis.

Si Alvarez nakaangkon og mga samad pinusilan sa tiyan, walang bukton ug ang bala milahos ngadto sa iyang ilok ug ngadto sa walang bahin sa lawas.

Sila si PO1 Jude Enemecio, PO2 Antonio Asoy Jr., SPO4 Daniel Tarucan, SPO1 Mikie Espina ug PO3 Benedicto Lasque, daling miresponde sa maong insidente apan wala na maapsi si Abendan.

Sa wala pa mahitabo ang insidente ang suspek ug biktima mipalit sa away sa mga silingang sila si John-John Traya ug sa ginganlan og “Tiguwang.”

Si Abendan ug Alvarez maoy nagkasukmagay hangtud nga sila giulang sa mga silingan apan wala kini matapos didto ug pagkataud-taod nagpinangitaay ang duha ug dihang nag-abot sa dumpsite buto-buto nalang ang nadunggan sa mga tawo ug patay na si Alvarez.

Sa ilang pagsusi nagbuy-od na ang biktima nga wala nay kinabuhi. Narekober diha sa iyang lawas ang binsol (tunok sa ikog sa pagi) nga gipormang icepick, cellphone ug P15. (BANAT NEWS)