CEBU, Philippines - Giunay og patay sa kaugalingong anak ang iyang inahan nga walo ka buwang mabdos ug ang igsuon niining 5-anyos pasado alas-6 sa buntag kagahapon sa barangay Naalad syudad sa Naga.
Ang mabdos nga inahan nga gipatay nagpangidaron og 39-anyos, ug ang anak niining babayeng 5-anyos nga igsuon sa 16-anyos nga suspek kansang mga pangalan gipugngan sa Banat News tungod sa pangidaron sa suspek.
Hinuon usa sa mga kauban sa 16-anyos nga posibleng malakip sa makasuhan mao ang 19-anyos nga si Brian Pansoy kinsa giingong maoy tag-iya sa armas nga gigamit sa pagpatay sa mga biktima.
Sa pakighinabi sa Banat News ni Chief Inspector Timar Alam, hepe sa Naga Police mibutyag layo og tinan-awan ang 16-anyos nga suspek dihang ilang naabtan diha sa ilang balay ug ilaha kining giimbitar.
Nasuta usab nga daghan kini og mga garas sa kalawasan ug bukton apan wala pa dayon sila magdudang mao kini ang suspek apan sa tanto nilang pagsukit-sukit mitug-an kini sa iyang gibuhat sa mga biktima.
Butyag pa ni Alam nga ang 16-anyos sa sayo pa nakig-inom kang Pansoy tungod kay pista man apan dihang nahutdan og ilimnon gimandoan kini ni Pansoy nga papangayuon ngadto sa inahan niini og kwarta.
Ang 16-anyos miadto sa iyang inahan uban si Pansoy sakay sa usa ka motorsiklo apan si Pansoy gikatahong nagpabilin sa motor ug ang 16-anyos lang maoy miadto sa ilang panimalay.
Sumala pa ni Alam nga ang armas nga .357 rebolber gitug-an sa 16-anyos nga gipahulam ni Pansoy. Apan matud pa nga pag-abot niini kalit nga gihapsan sa suspek ang ulo sa inahan sa maong armas.
Ang iyang 5-anyos nga manghod pagkakita sa gibuhat sa maguwang sa ilang inahan mikisi-kisi sa paghilak hinungdan nga giapil kini og hapos sa suspek sa maong armas diha sa ulo.
Sumala pang Alam human niini, mikuha ang suspek sa usa ka kutsilyo ug diha-diha gisugdan og hansak ang kalawasan sa inahan ug sa manghod nga niadtong tungura dili na makapanagang tungod sa paghapos.
Nasuta usab ni Alam nga kaniadto gipalayas sa inahan ang 16-anyos tungod sa pagkabuluyagon niini ug mangunay og pangawat sa inahan ug sukad niadto wala na kini suportahi pa.
Namatikdan usab ni Alam base sa pamahayag sa suspek ang kahilabihan niining kasuko sa inahan nga maoy gituohan niyang nagtukmod aron buhaton ang maong krimen.
Nagtuo ang kapolisan nga ang 16-anyos gyud ang mihimo sa krimen sanglit ang mga silingan wala gyud makadungog og kasikas ingon man paghot sa mga iro, wala say nakit-ang force entry nga nahitabo.
Nabawi usab sa kapolisan ang cellphone sa inahan nga giprenda sa 16-anyos ngadto sa higala nga nailhan lang sa pangalan nga Mac-mac ug ang armas nga gigamit pagpukpok sa biktima.
Ang inahang mabdos nagbuy-od na sa bangko samtang sa tiilan niini ang 5-anyos dihang napalgan sa batang gisugo aron mopalit sa tindahan sa mga biktima.
Ang biktima nga si Bantilan usa ka negosyante og baboy ug aduna usab kini tindahan ug magpautang og kwarta nga dinagko sa ilang dapit.
Unang mitumaw nga motibo sa sayo pa kagahapon nga posibleng tulis ang nahitabo apan nausab ang ilang pagduda dihang miangkon ang 16-anyos sa krimen.
Matud pa ni Alam nga posibleng makasuhan ang 16-anyos og parricide o robbery with parricide samtang si Pansoy posible usab nga makasuhan og conspiracy to parricide apan giklaro ni Alam nga ila pa nga gitimbang-timbang ang kaso nga ilang isang-at. (EIM) (BANAT NEWS)