CEBU, Philippines - Mipahigayon og imbestigasyon ang kapolisan sa Presinto 3 sa Basak Police Station sa dakbayan sa Mandaue sa kamatayon sa usa ka batang babaye nga napalgang naglutaw sa linaw sa tubig diha sa Palm Hills Subdivision sa Upper Tabok sa dakbayan sa Mandaue.
Ang namatay mao si Crislie Yocte, 7, nagpuyo sa maong dapit unang gikataho sa amahan ngadto sa kapolisan sa Presinto 3 sa Basak Police Station sa Mandaue City (MCPO) nga patay na kini nilang nakit-an nga naglutaw sa linaw sa maong dapit alas-5 pasado na ang takna sa hapon sa miaging adlaw.
Si SPO2 Danilo Barrita sa kapolisan sa maong presinto nga nahinabi sa Banat News nagkanayon nga ang mga ginikanan wala masayod kun naligo ba ang biktima sa maong linaw ug nalumos.
Wala usab sila masayod kung si kinsa ang uwahing gikauban sa ilang anak sa dihang nalumos kini sa maong linaw. Gisugyot sa kapolisan ngadto sa mga ginikanan sa bata nga ipaubos sa awtopsiya ang patay’ng lawas niini aron sutaon kung unsay gikamatyan niini o kung gidagmalan ba kini sa ubang tawo. (BANAT NEWS)