Mga kadete mi-walkout

CEBU, Philippines - Pipila ka mga tinun-an sa Maritime Regiment sa Southwestern University ang mi-walkout sa ilang tunghaan gumikan kay matud pa, wala na sila kauyon sa pamaagi sa maong eskwelahan bisan paman nga ubos sila sa scholarship program.

Sa report sa TV Patrol Central Visayas kagahapon dunay usa ka tinun-an ang mipadayag sa pagkahibulong kun nganong dako gihapon ang iyang bayranan bisan man nga usa siya ka scholar partikular na sa programang “Study Now, Pay Later.”

Giingong mahal usab kaayo ang ilang bayranan sa lodging ug sa kuryente ug dunay mga panahon nga pan-os na ang ilang pagkaon.

Ang abogado sa mga tinun-an nga si Atty. Rex Fernandez mipadayag nga dili unta mosangpot sa pag-walkout kung mihimo pa og diyalogo ngadto sa mga tinun-an ang mga kadagkoan sa tunghaan.

Apan usa ka kanhi professor(di buot magpahingalan) sa maong tunghaan partikular na sa nahisgutang kurso nga gikahinabi sa Banat News kagahapon nga ang Seacrest Maritime Foundation Incorporated (SMFI) maoy dunay pagkuwang sa ilang mga tinun-an.

Gisaysay niya nga ang Maritime Regiment dili konektado sa SWU ug igo lang kini nag-abang sa pasilidad ug building sa maong tunghaan.

“Wala namang problema ang SWU, ang admin ng Maritime Regiment ang may pagkukulang,” sumala pa niini.

Matud pa niya nga dunay mga higayon nga dili ka-take ang mga tinun-an basta walay examination permit nga gidili sa CHED (Commission on Higher Education). (BANAT NEWS)