Mga karne sa Ramos Market gipanakmit

CEBU, Philippines -  Gisakmit   sa mga otoridad sa merkado kagahapon ang nagkalain-laing klase sa karne ug   mga water dispenser sa upat   ka stall sa Ramos Market gumikan   ang mga tag-iya ning maong mga baligya mi-display niini sa dili nila stall.

Sumala pa ni City Market Administrator Racquel Arce nga daan na nilang gibalaod ang higpit nga pagdili sa dili tag-iya sa stall sa pagbaligya og unsa man nilang tinda niini.

Wala pa hinuon itino ni Arce kun pila ka kilo tanan ang ilang nasakmit sanglit naggikan pa man kini sa upat ka mga tindahan ug ila pa kining gisusi karon.

Ang mga tawo nga naninda og mga tinda   sa dili nila   stall mag-atubang og tukmang silot agad sa gidaghanon sa produkto nga masakmit.

Mipahimangno si Arce sa mga negosyante sa nagkadaiyang merkado nga mas maayo nga motuman sila sa balaod aron dili maapektohan ang ilang panginabuhi. (BANAT NEWS)