4 drug pusher tiklo

CEBU, Philippines - Upat ka mga negosyante og gidiling drugas sa lungsod sa Bantayan ug Santa Fe nasikop sa kapolisan didto sa maong mga lugar niadtong Biyernes sa hapon.

Ang mga suspetsado mao sila si Pedro Tolentino, 34, alyas “Manok” taga barangay Bantigue, Bantayan; Jude Barreto alyas “Master”, 31, taga barangay Suba, Bantayan; Rey Espinosa, 38, dispatser sa jeep, taga barangay Poblacion, lungsod sa Santa Fe ug Reggiel dela Peña, taga barangay Sillion, Bantayan.

Si Tolentino ug Barreto nahilista na isip level 2 nga mga drug pusher sa ilang lungsod base sa record sa Cebu Provincial Police Office (CPPO).

Ang maong mga dinakpan temporaryong gibalhug karon sa prisohan sa Bantayan Police Station samtang gihikay pa ang tukmang kaso nga isang-at batok kanila.

Ang kapolisan sa Bantayan nga gipangulohan sa ilang hepe nga si Senior Inspector Florendo Fajardo; kapolisan sa Santa Fe nga gipangulohan usab ni Inspector Henry Orbiso ug mga sakop sa Provincial Intelligence Branch (PIB) nga gipangunahan ni Senior Inspector Mark Gifter Sucalit   maoy naghiusa sa   pagpangronda   sa mga panimalay sa mga suspetsado dala ang search warrant nga giluwatan ni Regional Trial Court (RTC) Judge Soliver Peras sa Branch 10.

Si Sucalit nagkanayon nga ang upat ka suspetsado giingong nabaniog na kaayong maoy tigpayuhot og gidiling drugas sama sa shabu sa lungsod sa Bantayan ug Santa Fe apan gikan sa dakbayan sa Sugbo ang ilang mga baligya.

Human   sa tulo ka oras nga dinakpanay, nasakmit sa mga otoridad gikan sa mga suspek ang   usa ka pocket tickler, mga resibo sa Pera Padala ug Kuwarta Padala, usa ka Unit nga RUSI nga motorsiklo, usa ka medium nga paketeng shabu, 45 ka gagmay’ng paketeng shabu, P14,500 nga kwarta, usa ka transparent pouch, 50 ka basiyong transparent plastic, usa ka ledger notebook.

Tulo ka improvised repacking, tulo ka improvised nga bamboo stick, duha ka dagom, tulo ka blade, usa ka carton box, usa ka improvised heat sealer, duha ka gunting, tulo ka lighter, usa ka tin-aw nga bildong plato, usa ka Samsung cell phone ug uban pa.

Ang mga suspetsado giingong dugay nang gipanid-an sa kapolisan sa ilang lungsod sa milabay’ng mga semana ug dihang napiho na ang ilang binuang nga negosyo gipanikop dayon sila.

Ang kaso nga paglapas sa Akta Republika 9165 o ang gitawag nga Comprehensive Dangerous Drugs Act maoy ipasaka batok sa maong mga dinakpan.   (WC)     - (BANAT NEWS)