Bala para sa konsehal mitaroy sa kustomer

CEBU, Philippines - Samdan ang usa ka babaye dihang mao kini naigo sa bala nga alang unta sa usa ka kagawad sa barangay San Roque, dakbayan sa Sugbo kinsa gipusil sulod sa iyang tindahan sa maong lugar kagahapon sa buntag.

Ang biktima mao si Josephine Sanjorjo, 52, taga barangay Zapatera, ning dakbayan sa Sugbo kinsa customer ni kagawad Bobby Morados sa maong higayon.

Si Morados maoy nagbantay sa ilang tindahan dihang kalit lang mihunong ang usa ka motorsiklo nga gisakyan og duha ka tawo.

Sa walay daghang langas, ang angkas niini sa likod maoy milanit sa iyang armas de fuego   ug miluthang kang Morados.

Apan malagmit gumikan sa kaabtik ni Morados nakahupo kini ug ang bala nga alang unta kaniya didto motaroy sa bukobuko ni Sanjorjo kinsa nagtalikod niadtong tungora kay nagpili og tsinelas.

Dihadiha, human makapusil, misirit dayon pahilayo sa maong lugar ang mga kriminal.

Samtang ang biktima gihatod usab dayon ngadto sa Cebu City Medical Center.

Si PO3 Wetzel Berry sa Cebu City Police Office (CCPO) homicide section mibutyag   nga usa sa mga anggulo nga ilang gisuta mao a ng bahin sa politika. Padayon pa nila karong gipangita ang mga kriminal. (BANAT)