CEBU, Philippines - Samaran ang usa ka sakop sa Barangay Public Safety Officer (BPSO) ug ang kaatbang niya sa pinusilay nga sakop sa Crips gang human sila magsinukliay og mga bala didto sa sitio Kagudoy, barangay Basak dakbayan sa Lapulapu kagahapon sa kaadlawon.
Ang mga angol mao sila si Juveli Abejuela, 43, minyo, usa ka sakop sa BPSO sa Basak, sa maong dakbayan, ug si Junald Alcover, 22, ulitawo, residente sa St. Jude Acres Subdivision, sa barangay Bulacao, dakbayan sa Sugbo usa ka pag-umangkon ni ANAD Partylist Representative Jun Alcover.
Si PO2 Franklin Bolaqiua sa kapolisan sa Lapulapu mibutyag sa Banat News nga si Abejuela nagbantay sa ilang BPSO outpost sa alas 2:15 sa kaadlawon dihang gipusil kini ni Alcover.
Apan gumikan kay praktisado, mibawos pagpusil si Abejuela ug nasabak sa hawak si Alcover ug silang duha didto dad-a sa Mactan Doctors Hospital. Sa dihang giimbistigar, pulos nag-iyahay og pasangil ang usa’g-usa nga nakapalibog sa imbistigador kinsay iyang tuohan. (BANAT NEWS)