17-anyos nasalbar gikan sa bar

CEBU, Philippines - Usa ka 17-anyos nga babaye ang gisalbar sa mga sakop sa Task force Oplan Night Watch Patrol batok sa human traffickers sulod sa usa ka bar pasado alas-10 sa miaging gabii sa sitio Laway barangay Luray 2 syudad sa Toledo.

Ang dalagita nga residente ra gihapon sa maong siyudad sa gipahigayong hiniusang operasyon sa tulo ka mga police stations sa managsilingang mga lungsod ug siyudad.

Sa pakighinabi sa Banat News ni SPO4 Gil Lastimosa sa Toledo Police kini miingon nga ang kapolisan sa Asturias, Aloguinsan ug syudad sa Toledo mipahigayon sa maong operasyon alang sa kampanya sa Anti-Trafficking on Persons Act.

Tuod man ilang gipangronda ang mga nagkadaiyang bars sa maong syudad ug diha sa usa ka KTV bar sa maong lugar ilang na-rescue ang menor de edad.

Matud pa ni Lastimosa nga ang menor de edad atoa na karon sa kustodiya sa Department of Social Welfare Development.

Ang nagkadaiyang lokal nga kagamhanan sa Sugbu pinangulohan sa Kapitolyo milusad og gubat kontra human trafficking nga miresulta na sa pagkasalbar sa pipila ka mga menor de edad ug mga babayeng sagad nagtrabaho sa mga balay kahilayan.

Giisip kini sa Kapitolyo nga usa ka matang sa pagpasipala ug pag-abuso sa kabataan ug kababayen-an.  - BANAT NEWS