Task group giumol pagsulbad sa pagpatay sa komentarista

Bacolod City, Philippines—Miumol ang Philippine National Police (PNP) Region 6 Office sa Task Group ‘Jimena,’ aron maoy motutok sa imbestigasyon ug masulbad og dali ang pagpatay sa komentaristang si Niel Jimena.

Si Jimena gipatay diha sa E. B. Magalona, Negros Occidental niadtong Lunes. Ang gitukod nga grupo sa kapolisan pagsulbad sa maong kaso mao ang Special Investigation Task Group ‘Jimena,’ nga gilangkuban sa Criminal Investigation and Detection Group (CIDG), PNP Crime Laboratory, Intelligence and Investigation Branches sa Negros Occidental Police Provincial Office (NOPPO).

Kini pangulohan ni Senior Superintendent Allan Guisihan, nga maoy police provincial director, ug Chief Inspector Ray Cuanico sa CIDG isip luyoluyong hepe niini.

Si Guisihan nagkanayon nga ilang tutukan ang tulo ka anggulo may labot sa kamatayon sa biktima nga naglakip sa iyang pagka-komentarista, pagka-kanhi confidential informant niini sa Philippine Drug Enforcement Agency (PDEA), ug ang mga personal nga kaaway.

Si Larry Trinidad, nga anchorman sa RMN-Bacolod nagkanayon nga si Jimena kaniadto informant sa PDEA apan migawas niini niadtong 2008.

Sa laing bahin, ang Negros Press Club (NPC) mikondenar sa maong pagpatay ug miapelar sa kapolisan ug uban pang tinugyanan sa balaod nga mataral gyud ang mga kriminal ngadto sa hukmanan.

“Condemns in the strongest words the senseless murder” (ni Jimena). Gihulagway sa kapolisan nga “professional hired assassins” ang mga kriminal.

Si Jimena maoy ika-146 nga tigbalitang biktima sa pagpatay sukad nga nabalik ang demokrasya sa nasud niadtong 1986 ug maoy ikasiyam nga tigbalitang gipatay karong tuiga sumala pa sa presidente sa Negros Press Club nga si Juan Elmer Ubaldo.

Sumala pa sa grupo “hard-hitting” nga komentarista si Jimena apan ang estilo niini sa pagkomentaryo dili paigong rason aron kini ipapatay.

Ang grupo miapelar usab kang Presidente Benigno Aquino sa paghatag og katarungan sa pagpatay sa maong tigbalita dungan sa pagtagana sa grupo og P500,000 cash reward alang sa pagkasikop sa mga kriminal.

Ang National Press Club mitagana nang daan og P100,000 cash reward sa parehong katuyoan.

Si Jimena luwan og motorsiklo sa Hacienda San Jose Brgy. Damgo sa E.B. Magalona dihang kini gibanhigan sa duha ka wala mailhing lalaking nagsakay usab og motorsiklo. Patay na kini pag-abot sa Teresita L. Jalandoni Provincial Hospital sa Silay City human makaagom og lima ka samad pinusilan.

Duha ka tuig na ang nakalabay napusilan usab si Jimena sa Victorias City , Negros Occidental apan nakalingkawas siya sa samad pinusilan sa paa. (BANATNEWS)